അലക്‌സാണ്ടര്‍ കുറുപ്പിന്റെ രണ്ടാം ഭാഗം അല്ലെന്നോ?…!! സത്യാവസ്ഥ തേടി ആരാധകര്‍…

മലയാള സിനിമാ ലോകത്ത് തന്നെ വലിയൊരു തരംഗം സൃഷ്ടിച്ച സിനിമയായിരുന്നു ദുല്‍ഖര്‍ സല്‍മാന്‌റെ കുറുപ്പ് എന്ന സിനിമ. ശ്രീനാഥ് രാജേന്ദ്രനാണ് കുറുപ്പ് എന്ന സിനിമ സംവിധാനം ചെയ്തത്. സിനിമ റിലീസായ അന്ന് തൊട്ട് ചിത്രത്തിന്റെ രണ്ടാം ഭാഗത്തെക്കുറിച്ച് സംസാരങ്ങളും ചര്‍ച്ചകളും ഉണ്ടായിരുന്നു. സംവിധായകനും ഇതേക്കുറിച്ച് ചെറിയ സൂചന തന്നിരുന്നു. ഇപ്പോഴിതാ ഈ നടനും സംവിധായകനും വീണ്ടും ഒന്നിക്കുന്നു എന്ന വാര്‍ത്തകളാണ് പുറത്ത് വരുന്നത്. ‘കുറുപ്പ്’ ചിത്രത്തിന് ശേഷം ദുല്‍ഖര്‍ സല്‍മാനും സംവിധായകന്‍ ശ്രീനാഥ് രാജേന്ദ്രനും ഒന്നിക്കുന്ന ചിത്രമാണ് ‘അലക്സാണ്ടര്‍’. ഈ ചിത്രം കുറുപ്പിന്റെ രണ്ടാം ഭാഗമല്ല എന്നാണ് പ്രമുഖ മാധ്യമങ്ങള്‍ റിപ്പോര്‍ട്ട് ചെയ്യുന്നത്. കുറുപ്പ് സിനിമയുമായി അലക്സാണ്ടര്‍ എന്ന പുതിയ ചിത്രത്തിന് യാതൊരു ബന്ധവുമില്ല എന്നാണ് പറയപ്പെടുന്നത്.

കുറുപ്പിന്റെ ക്ലൈമാക്സില്‍ ദുല്‍ഖര്‍ അലക്സാണ്ടര്‍ എന്ന കഥാപാത്രത്തിന്റെ ഗെറ്റപ്പില്‍ എത്തുന്നുണ്ട്. ഇതേ ഗെറ്റപ്പില്‍ തന്നെയാകും പുതിയ ചിത്രത്തില്‍ ദുല്‍ഖര്‍ എത്തുക. കുറുപ്പ് സിനിമയുടെ 50ാം ദിവസം ‘അലക്സാണ്ടര്‍’ എന്ന പ്രോജക്ടിന്റെ ഔദ്യോഗിക പ്രഖ്യാപനം ഉണ്ടായേക്കും. അടുത്ത വര്‍ഷം സിനിമയുടെ ചിത്രീകരണം ആരംഭിക്കും. കഴിഞ്ഞ ദിവസമാണ് ‘ദ റൈസ് ഓഫ് അ്ലക്സാണ്ടര്‍’ എന്ന ക്യാപ്ഷനോടെയുള്ള ക്യാരക്ടര്‍ പോസ്റ്റര്‍ ദുല്‍ഖര്‍ സോഷ്യല്‍ മീഡിയയിലൂടെ പങ്കുവെച്ചത്. അതേസമയം, നവംബര്‍ 12ന് തിയേറ്ററുകളിലെത്തിയ ‘കുറുപ്പ്’ ദുല്‍ഖറിന്റെ കരിയറിലെ ഏറ്റവും വലിയ ചിത്രമായിരുന്നു. കുപ്രസിദ്ധ പിടികിട്ടാപ്പുള്ളി സുകുമാരകുറുപ്പിന്റെ ജീവിതകഥയുടെ അടിസ്ഥാനത്തിലായിരുന്നു കുറുപ്പ് എന്ന ചിത്രം ഇറങ്ങിയത്.